Stanje u Kijevu trenutno mirno. Moskva sumnja u legitimet novih vlasti i prijeti embargom na njene poljoprivredne, a možda i druge proizvode.

U Kijevu su danas otvorene prodavnice, restorani i željeznička stanica, taksisti voze, a policije nema na ulicama, mada su se protekle noći čuli pucnji, javio je dopisnik Itar-Tasa.

Ova zemlja se, međutim, kao posljedicom krvavih nemira i dugogodišnje recesije, suočava sa prijetnjom brzog bankrota, ali i nagoviještenim embargom Rusije na njene poljoprivredne, a možda i druge proizvode.

Istovremeno, ruski premijer Dmitrij Medvedev je izjavio da njegova vlada gaji ozbiljne sumnje u legitimitet onih koji su došli na vlast u Ukrajini nakon opoziva predsjednika Viktora Janukoviča, dodavši da činjenica da su neke države priznale takvo stanje predstavlja „odstupanje od normale“. Ruski MIP je ocijenio da se ukrajinski mirovni sporazum koristi kao paravan za otimanje vlasti i da novo ukrajinsko vođstvo koristi „terorističke metode“ u primjeni pritiska na neistomišljenike, uključujući one na Krimu i istoku Ukrajine.

Generalni sekretar UN Ban Ki-mun izjavio je danas da treba sačuvati jedinstvo i teritorijalni integritet Ukrajine i poslao izaslanika u Kijev. Francuski ministar spoljnih poslova Loran Fabijus apelovao je

na Rusiju da nastavi sa pružanjem finansijske pomoći Ukrajini, jer je pogođena političkom krizom i „nema vremena za gubljenje“.

Grčki ministar spoljnih poslova Evangelos Venizelos predložio je održavanje međunarodne konferencije uz učešće Evropske unije, Rusije i finansijskih institucija, da bi se izbjegao bankrot Ukrajine.

Šef njemačke diplomatije Frank-Valter Štajnmajer upozorio je da želja za osvetom ne smije definisati politiku nove ukrajinske vlasti i da buduće političke vođe moraju zaustaviti eskalaciju nasilja, tražiti dijalog i težiti harmoniji političkih partija i regiona.

SAD: JANUKOVIČ NE VODI ZEMLJU AKTIVNO

SAD nisu potvrdile da privremenog lidera Oleksandera Turčinova smatraju legitimnim predsjednikom, navodeći da Viktor Janukovič „trenutno ne vodi zemlju aktivno“. Janukovič se navodno nalazi na Krimu, proruskoj oblasti Ukrajine, prenio je AP.

Predstavnik Bijele kuće Džej Karni je rekao da Bijela kuća smatra da je ukrajinski parlament „zakonski izabrao svog novog predsjednika“ i da podržava napore da se politička situacija stavi pod kontrolu i obezbijedi rad vladinih institucija.

Na pitanje da li SAD smatraju time Turčinova legitimnim vođom Ukrajine, Karni je odgovorio da Vašington smatra da je „on izabrani vođa parlamenta“.

Turčinov je predsjednik ukrajinske Vrhovne rade (skupštine) koji je privremeno preuzeo dužnosti predsjednika države nakon što je u parlamentu izglasan opoziv Janukoviča i što su raspisani parlamentarni izbori za 25. maj.

On je istakao da SAD vjeruju da predsjednik Rusije Vladimir Putin, s kojim je njegov američki kolega Barak Obama razgovaro o ukrajinskoj krizi u petak, ima interes da obezbijedi mirnu tranziciju vlasti u Kijevu.

„Nema protivrječnošti u tome da Ukrajina i ukrajinski narod odluče da idu u dalje evropske integracije, a da pri tom zadrže snažne istorijske i ekonomske odnose s Rusijom. Smatramo da je to sasvim odgovarajuće“, rekao je on.

 

Ostavi poruku